TIRANË– Kryeministri Edi Rama deklaroi këtë të mërkurë që njolla e vënë ndaj ish-krerëve të Ushtrisë Çlirimitare të Kosovës duhet hequr. Deklaratat kreu i qeverisë i bëri gjatë një prononcimi për mediat pas mbarimit të takimit të liderëve të Këshillit të Europës në Islandë. Sipas Ramës njollosja e tyre e ka zanafillën në Rusi.
Pyetje: Zoti kryeministër, ju iu adresuat në fjalimin tuaj edhe çështjes së Kosovës. Si do vazhdojë qëndrimi i Shqipërisë në lidhje me atë që ju pretendoni për pafajësinë e kryeministrit Thaçi dhe të gjithë personave të tjerë?
Edi Rama: Jo, kjo nuk është një çështje pafajësie apo fajësie sepse kjo është çështje e tribunalit. Çështja është e heqjes së një njolle që Asambleja e Këshillit të Europës i ka vënë Shqipërisë dhe Lëvizjes Çlirimtare të Kosovës, nën ndikim e fortë të Rusisë në vitin 2011 dhe bërja e një raporti të ri në dritën e faktit tanimë të stërprovuar që nuk ka pasur kurrë trafik organesh.
