SUEDI– Lauren Spaho është 20-vjeçari nga Korça, i cili më 8 maj u masakrua 25 herë me thikë nga disa persona me kombësi arabe në qytetin Karlstad të Suedisë. Ngjarja e rëndë ka ndodhur pasi i riu ishte futur për të ndarë një sherr ku ishin përfshirë miqtë e tij. Mësohet se Spaho kishte mbërritu në Suedi vetëm një ditë më parë dhe se punonte në ndërtim. Më 8 maj ai kishte shkuar në një disko bashkë me disa miq të tij për të festuar.
Brenda ambienteve të diskos ka nisur një sherr midis bashkëmoshatarëve të 20-vjeçarit dhe ai ka ndërhyrë për t’i ndarë. Mediat vendase raportojnë se pasi kanë dalë nga disko, grupi i të rinjve me kombësi arabe kanë sulmuar shqiptarin duke e goditur mbi 25 herë me thikë. Goditjet që kanë rezultuar fatale për të. Spaho është dërguar menjëherë në spital ku ka qëndruar 24 orë në gjendje kome, por fatkeqësisht e humbi betejën e tij me jetën.
Mësohet policia suedeze fillimisht ka shoqëruar 9 arabë dhe më pas është dhënë masa “arrest me burg” për 5 prej tyre. Në burg aktualisht ndodhen tre persona për këtë ngjarje të rëndë. Autoritete në Suedi pas ngjarjes janë lidhur me autirotetet shqiptare, të cilat më pas janë lidhur me familjarët e të riut ku u kanë dhënë dhe lajmin e kobshëm për vdekjen e 20-vjeçarit. Por mësohet se se familja e ka të pamundur për marrjen e trupit.
Për mediat shqiptare familjarët e Laurenit kanë treguar se pavarësisht se kanë kaluar 10 ditë nga ngjarja e rëndë, po hasin shumë vështirësi për sjelljen e trupit të 20-vjeçarit në Shqipëri. Familja Spaho pretendon se autoritetet shqiptare nuk i janë përgjigjur kërkesave të tyre për ndihmë, që të marrin trupin e djalit të tyre dhe se ambasada jonë atje nuk i ka ndihmuar. Babai i të ndjerit shprehet se ka tentuar vetë të shkojë në Suedi që të marrë trupin e djalit, por nuk është lejuar. Autoritetet suedeze kërkojnë që të përfundojnë të gjitha procedurat hetimore, dhe nuk po lejojnë marrjen e trupit të 20-vjeçarit nga familja.
