KURBIN– Detaje të reja janë zbardhur nga ngjarja e rëndë e regjistruar një ditë më parë në Kurbin ku ish-deputetit socialist Armando Prengës iu zu pritë me armë zjarri. Fatmirësisht plumbat e lëshuar drejt automjetit të Prengës nuk e kapën këtë të fundit. Në Polici ish-deputeti i Kurbinit ka deklaruar se nuk ka konflikt me njeri ndërsa menjëherë pas ngjarjes blutë e Kurbinit e lidhën situatën me zgjedhjet vendore të 14 majit dhe një debat që degjeneroi në dhunë fizike në një nga KZAZ-të ku kryhej numërimi i votave në Kurbin.
Autori që qëlloi drejt mjetit të Prengës dyshohet se është Fatbardh Ismaili, djali i Islam Ismailit, komisionerit të dhunuar gjatë procesit të numërimit të votave në Bashkinë e Kurbinit, një proces i cili u shoqërua me tensione të shumta ku u desh dhe ndërhyrja e Policisë. Mësohet se Islam Ismaili, i cili dhe ishte i përfshirë në konflikt ka thënë para efektivëve se në KZAZ-në numër 15 ka pasur një zënkë me Arben Prengën, vëllain i ish-deputetit por se nuk ka dijeni për vendndodhjen e të birit dhe as me ngjarjen.
Edhe Arben Prenga është marrë në pyetje në Polici ku ka treguar për konfliktin por jo se ka dijeni për atë që ka ndodhur pas tij. Ai ka deklaruar se nuk ka asnjë informacion në lidhje me atentatin e dështuar që iu bë të vëllait në zonën e Fushë Kuqes por që fatmirësisht Prenga nuk mori asnjë plagë. Pas ngjarjes ka lajmëruar me menjëherë policinë, e cila dhe ngriti pika kontrolli me qëllim kapjen e autorit të dyshuar por deri më tani nuk ka asnjë rezultat konkret.
