TIRANË– Kreu i grupit parlamentar i Partisë Socialiste Taulant Balla ka deklaruar këtë të hënë se opozitë për të dhe mazhorancën socialiste është Partia Demokratike e “vulës” dhe si kryetar grupi njeh Gazment Bardhin. Gjatë fjalës së tij për mediat nga Kryesia e Kuvendit Balla tha se po punohet për disa ndryshime në Reformën në Drejtësi për të cilët kërkohet shumicë votash duke shtrirë dorën ndaj PD-së.
Taulant Balla: Prej disa muajsh në Kuvendin e Shqipërisë po punohet për disa rregullime në Reformën në Drejtësi. Këto ndryshime vijnë si sygjerime nga institucionet partnere për reformën në drejtësi. Ka një grup pune ku mazhoranca dhe opozita do të ulen të punojnë. Opozita është Partia Demokratike, e cila ka shumicën. Për hirë të shqiptarëve duhet që të ulemi dhe të diskutojmë. Kush e jep votën për diçka të mirë për Shqipërinë nuk është tradhëti ndaj opozitës.
