TIRANË– Gazetari investigativ Artan Hoxha ka bërë një deklaratë të fortë këtë të hënë. I ftuar në News 24 Hoxha tha se Policia ka kryer një aksion antidrogë në zonën e “Kodrës së Diellit” dy ditë më pare dhe janë sekuestruar rreth 2.3 kg kokainë. Në pranga sipas Hoxhës kanë rënë pesë persona, 2 prej të cilëve nga Saranda dhe këshilltarë të sapo zgjedhur në vendoret e 14 majit.
Artan Hoxha: Ndoqa disa nga zonat, një nga to ishte Elbasani. Në zgjedhjet e kaluara pati edhe të vrarë, kësaj radhe rezultati ishte 7 mijë vota diferencë. Ato vota që dyshohej se aktivizoheshin nga personazhë të botës së krimit, nuk janë angazhuar. Pushteti nuk ka patur nevojë. E kam dëgjuar edhe zotin Berisha. Mos të gaboj pardje është bërë një operacion në Tiranë “Kodra e Diellit 2”, janë kapur 2.3 kg kokainë në Tiranë. 2 nga 5 personat e arrestuar janë nga Saranda dhe janë në listën për këshilltarë, Olsi Mylka dhe Shemsi Progda. Janë arrestuar menjëherë pas zgjedhjeve. Partia e tyre jo vetëm që ka marrë shumë vota, por edhe 2 mandate këshillarësh. Këta konkurojnë, marrin vota dhe këshilltar. 30 mijë euro e kishin kilen këta. Provë shumë e qartë sesi interferohen zgjedhjet.
