TIRANË– Kryetari i Partisë Demokratike, Sali Berisha, ka pritur në një takim kryetarin e komunës së Ulqinit Omer Bajraktarin dhe një delegacion shoqërues. Gjatë takimit të zhvilluar në selinë blu kryekomunari i Ulqinit ka shprehur solidarizimin e tij me dhunën e ushtruar ndaj kreut të PD në protestën e dy ditëve më parë.
Nga ana e tij kryedemokrati Berisha e ka falenderuar zotin Bajraktari për vizitën dhe shprehjen e mbështetjes vëllazërore dhe biseda ka kaluar te sfidat e faktorit shqiptar në Shqipëri, Mal të zi dhe në gjithë Ballkanin. Berisha ka kujtuar se në vitin 2013, Shqipëria ia kalonte Malit të zi për nivelin e rrogave, ndërsa sot Mali i Zi ka rrogat me te larta ne rajon ndërsa Shqipëria aktualisht i ka rrogat 20-30% përqind më të ulëta se Kosova, duke u renditur e fundit në rajon.
Kryetari i Ulqinit ka shprehur shqetësimin për mungesën e një pike doganore në anën shqiptare në Zogaj të Shkodrës, duke e informuar kryetarin e PD se malazezët e kanë hapur në anën e tyre. Në fund të një bisede me nota solidariteti dhe vëllazërie, Bajraktari e ka ftuar kryetarin e PD për të vizituar Komunën e Ulqinit ftesë të cilën ai e pranoi me kënaqësi.
