TIRANË– Në mbledhjen e kësaj të mërkure qeveria ka vendosur ndryshimin e kritereve për certifikimin e subjekteve agroturistike. Lajmin e bëri me dije ministrja e Bujqësisë Frida Krifca, e cila deklaroi përballë gazetarëve se në të gjithë Shqipërinë janë rreth 70-80 agruturizme, të cilat u shërbejnë komuniteteve. Sipas ministres brenda një viti janë gjeneruar 80 mln euro të ardhura nga agroturizmi.
Frida Krifca: Sot në mbledhje Këshilli i Ministrave ka miratuar vendim për ndryshimin e kritereve për certifikimin e subjekteve agroturistike. Erdhi ndryshimi prej kërkesave të grupeve të interesit që duan të përfitojnë nga një politikë fiskale që e kemi ndërtuar që në vitin 2018 dhe kemi bërë të mundur që të japim paketë fiskale që i favorizon si TVSH 6%, tatami mbi fitimin 5% dhe taksa e infrastrukturës 0. Në fakt ka qenë kjo politikë që i ka ndihmuar agroturizmat të përfitojnë. Ne agroturizmin e shohim si aktivitet i diversifikimit të fermës në zonat e thellave rurale që kryejnë aktivitete të mikpritjes, të mbështetura edhe prje qeverisë. Janë rreth 70-80 anembanë Shqipërisë dhe i shërben komuniteteve. Nga llogaritë e fundit, 80 mln euro të ardhura janë gjeneruar në vit nga agroturizmi, i cili ndihmon shumë bujqësinë se krijon magnet për të përthithur rininë.
