GJIROKASTËR- Tre persona janë arrestuar në Gjirokastër me 70 kg kanabis. Mësohet se të tre këta persona me precedentë të mëparshëm kriminal në fushën e narkotikëve. Në pranga janë rënë 39-vjeçari Sotir Rroshi, 37-vjeçari Fernando Toska si dhe 37-vjeçarja Maria Çaushi. Ndalimi i tyre u bë në aksin nacional “Ersekë – Tre urat”, Përmet, automjetin tip “Volvo” dhe gjatë kontrollit kanë gjetur të fshehura në vende të përshtatura, 87 pako të mbushura lëndë të dyshuar narkotike kanabis, me peshë totale 70 kg.
Njoftimi i Policisë:
Seksioni për Hetimin e Trafiqeve të Paligjshme dhe Narkotikëve dhe Seksioni Operacional, në Drejtorinë Vendore të Policisë Gjirokastër, në bashkëpunim me Forcën e Posaçme Operacionale të Policisë së Shtetit, nën drejtimin e Prokurorisë pranë Gjykatës së Rrethit Gjyqësor Gjirokastër, pas një pune intensive hetimore disamujore, finalizuan me sukses operacionin e koduar “Sateliti”, si rezultat i të cilit u bë kapja dhe arrestimi në flagrancë i shtetasve: M. Ç., 37 vjeçe dhe S. Rr., 39 vjeç, të dy banues në Gjirokastër; F. T., 37 vjeç, banues në Tiranë, me precedent të mëparshëm kriminal në fushën e narkotikëve.
Gjatë operacionit, shërbimet e Policisë kanë ndaluar në aksin nacional “Ersekë – Tre urat”, Përmet, automjetin tip “Volvo”, me drejtues shtetasin S. Rr. dhe pasagjere shtetasen M. Ç. Gjatë kontrollit në këtë automjet, shërbimet e Policisë kanë gjetur të fshehura në vende të përshtatura, 87 pako të mbushura lëndë të dyshuar narkotike kanabis, me peshë totale 70 kg. Gjithashtu, shërbimet e Policisë kanë ndaluar automjetin me drejtues shtetasin F. T., i cili kontrollonte rrugën, me qëllim për të sinjalizuar 2 shtetasit e tjerë, për prezencën e shërbimeve të Policisë.
Në cilësinë e provës materiale u sekuestruan 70 kg lëndë e dyshuar narkotike kanabis, 2 automjete dhe 7 aparate celulare. Specialistët për Hetimin e Narkotikëve, nën drejtimin e Prokurorisë, vijojnë punën për identifikimin dhe kapjen e personave të tjerë të përfshirë në këtë veprimtari kriminale. Materialet i kaluan Prokurorisë pranë Gjykatës së Rrethit Gjyqësor Gjirokastër, për veprën penale “Trafikimi i narkotikëve”, kryer në bashkëpunim.
