TIRANË– Zbardhet ngjarja e rëndë e vendosjes së një sasie tritoli në ambientet e një biznesi fasonerie në zonën e Freskut në Tiranë. Pëermes një njoftimi për mediat Policia bën me dije së në pranga ka rënë Edmond Arapi, 46 vjeç, i cili dyshohet të jetë dhe porositësi i sulmit me tritol.
Ai i kishte dhe një shumë parash prej 100 mijë lekësh një 16-vjeçari për të vendosur lëndën plasëse dheopër të mos nxjerrë emrin e tij pavarësisht se çfarë ndodh.
Pas ngjarjes Arapi është larguar nga Tirana dhe është fshehur në Himarë, aty ku dhe u vu në pranga nga efektivët. Ndëraa 16-vjeçari ka treguar para hetuesve se paratë i kishte marrë nga Arapi. Shkak për këtë ngjarja dyshohet një borxh prej 100 mijë eurosh që autori pretendon se i ka italiani Roberto Bingaido. 46-vjeçari e ka kërcënuar disa herë italianin që t’i jepte paratë. Kur ky i fundit nuk pranoi të paguante gjobën Arapi organizoi vendosjen e tritolit ne fasoneri.
NJOFTIMI I POLICISË:
Zbardhet dhe dokumentohet ngjarja e ndodhur më datë 25.05.2023, në rrugën “Fadil Deliu”, ku shpërtheu një sasi lënde plasëse në portën e jashtme të një fasonerie. Finalizohet nga Komisariati i Policisë Nr. 4, operacioni policor i koduar “Explosion”.
Identifikohen, kapen dhe vihen në pranga një 46-vjeçar dhe një 16-vjeçar. 46-vjeçari dyshohet se ka shtytur 16-vjeçarin, duke i ofruar një shumë parash, për vendosjen e sasisë së eksplozivit, nga shpërthimi i së cilës u shkaktuan vetëm dëme materiale.
Sekuestrohen një biçikletë e përdorur nga 16-vjeçari, e dyshuar e vjedhur më parë, veshje që ai ka përdorur gjatë vendosjes së eksplozivit dhe një mekanizëm arme. Specialistët për Hetimin e Krimeve të Komisariatit të Policisë Nr. 4, në bashkëpunim me Komisariatin e Policisë Nr. 5 dhe atë të Himarës, në vijim të punës për zbardhjen dhe dokumentimin e ngjarjes së ndodhur me datë 25.05.2023, në një fasoneri në rrugën “Fadil Deliu”, bazuar dhe në informacionet e siguruara nga inteligjenca informative, kanë organizuar dhe finalizuar me sukses operacionin policor të koduar “Explosion”.
Si rezultat i këtij operacioni u bë arrestimi i shtetasit E. A., 46 vjeç dhe i një shtetasi 16 vjeç.
Nga veprimet hetimore dhe provat e siguruara dyshohet se 46-vjeçari e ka shtytur 16-vjeçarin, duke i ofruar shumë 100 000 lekë të rinj, për të vendosur sasisë e lëndës plasëse në fasonerinë në pronësi të shtetasit R. G. Në cilësinë e provës materiale u sekuestruan një biçikletë e përdorur nga 16-vjeçari, e dyshuar e vjedhur më parë, veshjet që ai ka përdorur gjatë vendosjes së eksplozivit, si dhe një mekanizëm shkrehës arme, e cila u gjet gjatë kontrollit të banesës së shtetasit E. A. Materialet i kaluan Prokurorisë, për veprime të mëtejshme procedurale.
