TIRANË– Është mbajtur ditën e djeshme Kuvendi Kombëtar i Forumit Rinor të Partisë Demokratike. Gjatë fjalës së tij kryetari i FRPD Besart Xhaferri e vuri theksin tek largimi i të rinjve. Sipas kreut të FRPD-së mbi 750 mijë të rinj e të reja kanë emigruar jashtë vendit vitet e fundit, kjo pasi u mungon shpresa për një jetë më të mirë në vendin e tyre.
Ai u ndal dhe tek sulmi ndaj Sali Berishës protestën e 6 dhjetorit ku kreu i PD u qëllua me grusht nga 31-vjeçari Gerti Shehu. Xhaferri tha ajo që ndodhi ishte një atentat ndaj kryedemokratit, për të cilin tha se nuk i ka braktisur për asnjë moment të vetëm të rinjtë demokratë.
Nuk munguan as kritikat për qeverinë, i ashpër ishte reagimi i tij ndaj mazhorancës të cilën e quajti një regjim që po shpopullon vendin. Para të rinjve demokratë të cilët i dhanë dhe votëbesimin pak muaj më parë ai u bëri thirrje që të grumbullojnë të gjitha energjitë pasi sipas tij FRPD ka ndezur motorët e fushatës për zgjedhjet lokale të 14 majit të vitit që vjen.
Nga ky Kuvend u përzgjodhën dhe emrat e rinj të anëtarëve të Këshillit Kombëtar të FRPD. 150 të rinj morën besimin e delegatëve të Kuvendit për të qenë të zgjedhurit e ‘parlamentit’ të Forumit Rinor.
FJALA E PLOTË E KREUT TË FRPD:
I nderuar Kryetari i Partisë Demokratike të Shqipërisë, Dr. Berisha! Faleminderit që jeni sot këtu mes nesh! Më pyetën dje në media nëse do ishit prezent! Qesha, sepse ju nuk munguat as një sekond edhe pas atentatit që vetëm burracakët mund ta bëjnë! Të nderuar anëtarë të kryesisë të Partisë Demokratike! Të nderuar delegatë të Kuvendit të Forumit Rinor! Te dashur të rinj demokratë! Sot vendosëm të organizojmë Kuvendin Kombëtar! Nuk ka datë më domethënëse se kur duhet të mblidhet dhe kuvendoj rinia! Kemi fatin të jemi pasardhës direkt të asaj Rinie që në këtë ditë në 1990 rrëzoi diktaturën më të egër që ka njohur Europa.
Kishin përballë çdo pushtet kundër, ashtu si sot! Në mos më keq! Sepse në 1990, pas gati 50 vitesh dhunim kolektiv, liria ishte një utopi e pa provuar, e pa lexuar, e pa arritshme! Ishte koha kur guximtarët që donin të çanin kufirin e burgut 28 mijë kilometra katror, i priste plumbi dhe marrja e jetës! Ishte koha kur dëshira jo vetëm për të folur, por edhe për të lexuar më shume seç duhej, të dërgonte në burg ose internim! Ishte koha kur dhunohej dinjiteti njerëzor! Ishte koha kur errësira nuk njihte kufij! Pra, të gjithë duhet të jemi mirënjohës për ata të rinj!
Dhe pse jo te pyesni veten sot: Ku ndodhemi? Çfarë epoke po jetojmë? A jemi të lirë? A jemi të shtypur? A jemi të braktisur? A jemi të komanduar dhe imponuar se si duhet të mendojmë, festojmë dhe jetojmë? Secili i përgjigjet vetë këtyre pyetjeve! Ajo që mund tju them, me përulësi, është që kjo nuk është Shqipëria dhe shoqëria ku unë vendosa të kthehem për të jetuar në 2013! Një regjim, ku fasada ka më shumë rëndësi se esenca, propaganda më shumë se e vërteta, pushteti më shumë se drejtësia, droga më shumë se biznesi, krimineli më shumë se mësuesi, diktatori më shumë se kushtetuta! Një regjim që sot ka larguar 750 mijë bijë dhe bija të këtij vendi, ku nuk ndalet ndaj asgjëje sepse i ka plasur cipa dhe më limit nuk ka, ku shtantazhi është mjet i pranuar, ku rinia nuk bën më pjesë në planet e saja!
Te dashur miq! Shqipëria është një vend i bekuar! Jo vetëm nga Zoti, por edhe nga talentet njerëzore që ka! Talente që pushtojnë botën në art, muzik, biznes, mjekësi, shkencë dhe sporte! Talente që këtë vend mund ta zhvillojnë shumë kollaj në nivelet më të larta të Bashkimit Europian! Ata jeni ju dhe shokët, shoqet, motrat dhe vëllezërit që ju janë larguar nga ky vend! Më besoni! Mezi po presin të kthehen! Duart iu hanë dhe zemra iu qanë për të arritur këtu, në gjirin e familjes, çdo sukses që kanë arritur larg këtij vendi! Por ata duan ta arrijnë si të lirë! Të respektuar nga ligji dhe krenar për shoqërinë ku do jetonin! Kjo barrë na bie ne!
Barra për t’u bashkuar, për të punuar dhe për të rrëzuar këtë regjim mbytës ndaj perspektivës së atdheut tonë! E di që disa prej jush shohin rrugën më të thjeshtë largimin! Ai nuk është asgjë më tepër se nje purgator ndjenjash mes suksesit dhe vetmisë, qetesisë personale dhe merakut për familjen, përmbushjes profesionale dhe të qënurit i huaji i përjetshëm, ecjes përpara gjithmonë me kokën mbrapa! Guri i rëndë në vendin e vet! Kot nuk e kanë thënë prej mijëra vitesh paraardhësit tanë shtegtar nëpër botë!
Është koha ti themi këtij regjimi boll më! Sot e tutje vendosim ne! Ne që punës nuk i themi jo, ne që dimë të krijojmë ekip, ne që dimë të ofrojmë alternativën më të mirë për të varfërin, për të pasurin, për të riun, për të vjetrin, për mbështetësin por edhe për më skeptikun! Ne jemi Forumi Rinor më i madh në këtë vend! Ne jemi Forumi Rinor i Partisë Demokratike, pasardhës të atyre studentëve guximtarë qe filluan misionin për ta bërë Shqipërinë si gjithë Europa! Si gjithë Europa do bëhet! Do e rrezojmë këtë regjim! Ndaj nga sot, në këtë kuvend, ne çelim zyrtarisht fushatën tonë, bëjmë zotimin tonë, se këto 5 muaj do punojmë dite e natë për t’i rikthyer qytetet qytetarëve dhe për të përmbysur këtë diktaturë mbytëse ndaj çdo te riu dhe prindi në këtë vend! Zoti e bekoftë Shqipërinë! Ju faleminderit!
