KORÇË– Një person ka mbetur i plagosur këtë të shtunë si pasojë e një aksidenti rrugor të regjistruar në aksin rrugor Korçë-Bilisht. Përmes një njoftimi për mediat blutë e Korçës bëjnë me dije se në pranga ka rënë një 30-vjeçar pasi dyshohet të jetë dhe shkaktar i aksidentit. I riu duke drejtuar mjetin në gjendje të dehur ka humbur kontrollin dhe i ka rënë mjetit të të plagosurit. Ky i fundit është në spital nën kujdesin e bluzave të bardha.
NJOFTIMI I POLICISË:
Specialistët e Trafikut Urban dhe Interurban në DVP Korçë arrestuan në flagrancë shtetasin R. B., 30 vjeç, banues në fshatin Vranisht, Devoll. Ky shtetas, duke drejtuar automjetin tip “Benz”, në aksin rrugor “Korçë-Bilisht”, pranë kryqëzimit të fshatit Progër, është përplasur me automjetin tip “Benz”, me drejtues shtetasin A. M., i cili për pasojë është dëmtuar dhe ndodhet në spitalin e Korçës, jashtë rrezikut për jetën. Pas kryerjes së testit të alkoolit, rezultoi se 30-vjeçari R. B. e drejtonte automjetin, në gjendje të dehur.
