TIRANË– Hakerat iranianë duket se janë vigjelentë dhe të vëmendshëm për të ndjekur zhvillimet politike në vendin tonë. Kështu ata ‘janë informuar’ për largimin e ambasadores amerikane Yuri Kim, e cila është në fund të mandatit të saj diplomatik.
Madje nuk kanë harruar që t’i vendosin kryqin ambasadores amerikane në Shqipëri, në një foto që ajo ka me kryeministrin e vendit, Edi Rama. Foton në grupin e hapur në rrjetin social “Telegram” e kanë shoqëruar me përshkrimin: Një iku, tani merremi me të tjerët (One down, many more to go…).
Ditën e djeshme Ministria për Europën dhe Punët e Jashtme me anë të një njoftimi bënte me dije se kishin nisur procedurat për largimin e ambasadores amerikane në Tiranë Yuri Kim duke qenë se mandati i saj mbaron në janar të vitit që vjen. Në pozitën e ambasadorit amerikan në Shqipëri, pritet të emërohet David Kostelanick, edhe pse ky proces nuk i takon aspak MEPJ shqiptare, por ekskluzivisht Departamentit Amerikan të Shtetit. Lëvizje kjo që mund të shkaktojë një incident diplomatik mes dy vendeve.
