FIER: Ervin Memo prej orësh tanimë ndodhet i ngujuar në makinën e tij pasi ka kundërshtuar vendosjen e një shtylle të tensionit të lartë në hapësirën e tokës së tij për të cilën sipas tij zotëron dokumentacion të rregullt. I indinjuar i riu ka treguar se policia është futur në orët e para të mëngjesit për ta nxjerrë jashtë ambienteve të tokës ,ku dhe do të vendoset shtylla e tensionit të lartë nga një kompani italiane.
Sakaq, Memo tregon ndër të tjera se si pasojë e situatës që ndodhet po kalon një traumë të padrejtë
“Në fillim pashë këta të firmës që bënin përgatitje për punë dhe menjëherë jam ngujuar brenda makinës. Kanë ardhur forcat e policisë dhe kanë tentuar të më nxirrnin. Kërkonin të më arrestonin me dhunë. Do qëndroj i ngujuar sepse jam në territorin e pronës time. Po përjetoj një traumë të padrejtë, se po të jetë diçka tjetër, unë jam i pari që zbatoj ligjin. Nuk dua as lekë, vetëm dua drejtësi. Rruga ku duan të bëjnë shtyllën, është këtu. Është zaptuar nga një zotëri tjetër aty. Rruga nuk vjen në tokën time. Unë ankohem sepse nuk do e bëjnë shtyllën aty në rrugë siç kanë letrat por duan të bëjnë tani në mes të parcelës”- tha ndër të tjera qytetari.
