SPANJË: Edhe pse jemi ende në stinën e pranverës duket se Spanja po përjeton një nga valët më të mëdha të të nxehtit, duke regjistruar temperaturën 38.8 gradë në provincën jugore e Kordobës. ‘Në mbarë Spanjën, temperaturat mes 1 marsit dhe 1 qershorit ishin mesatarisht 14.2 gradë Celsius,’-tha Ministria e Mjedisit. Këto temperatura ishin për 1.8 gradë më të larta sesa mesatarja e regjistruar mes vitit 1991-2020 dhe 0.3 gradë më e lartë sesa rekordi paraprak i regjistruar më 1997. Ky vend ende po përballet me një periudhë të gjatë të thatësirës që ka prekur prodhimin bujqësor, përfshirë edhe sektorin kyç të vajit që përbën pothuajse gjysmën e prodhimit botëror. Moti i nxehtë dhe i thatë sjellin rreziqe shtesë dhe studimet kanë treguar se ndryshimet klimatike kanë rritur rrezikun e zjarreve të egra.
“Po mësohemi me thyerjen e rekordeve”, tha Ruben del Campo, zëdhënës për agjencinë kombëtare të motit, AEMET. Ai shtoi se në tre nga katër stinët e fundit – vera dhe vjeshta e vitit 2022 dhe pranvera e vitit 2023 – ishin më të nxehtat në historinë e këtij shteti.
Pranvera e këtij viti ishte e dyta më e thatë në historinë e Spanjës, pasi deri në mes të majit, në këtë shtet nuk pati pothuajse fare reshje shiu, tha Del Campo.Sipas agjencisë AEMET, Spanja ka “shumë gjasa” që edhe një herë të përballet me një verë më të nxehtë se zakonisht gjatë këtij viti, veçmas në pjesën lindore të shtetit dhe në ishujt spanjoll.
AEMET ka parashikuar se ka shumë gjasa që kjo verë të jetë një prej pesë më të nxehtave në tri dekadat e fundit.
Më 2022, Spanja regjistroi temperaturat më të larta gjatë gjithë vitit dhe u godit nga tri valë të të nxehtit që zgjatën për 41 ditë./ REL
