TIRANË– Deputetja e Partisë Demokratike Ina Zhupa ka zhvilluar këtë të enjte një interpelancë me ministren e Arsimit dhe Sportit Evis Kushi në lidhje me shkrirjen e Akademisisë së Studimeve Albanologjike. Gjatë fjalës së saj Zhupa tha se kjo po bëhet për ti plotësuar dëshirat politike kreut të Akademisë së Shkencave Skënder Gjinushit. Nga ana tjetër ministrja Kushi deklaroi se të gjithë studiuesit e ASA-s nuk po “hidhen” në rrugë por do të punojnë në ASH.
Ina Zhupa: Reformat në këtë vend i bën Gjinushi. Ai thotë ashtu siç ikën me VKM, vijnë edhe më VKM. 15 vite në atë Akademi ka ndryshuar gjithçka. Po i ktheni Studimet Albanologjike në vasalë të Akademisë së shkencave. Ju bëni një VKM ku prishni Akademinë e Studimeve Albanologjike ku shkelni ligjet e vendimet e GJK-së pasi shkelni liritë akademike. Ju shkelni një institucione që është pjesë e konferencës së rektorëve dhe e fusni brenda akademisë së shkencave duke i shkelur lirinë akademike. 15 vite në atë Akademi kanë ndryshuar projektet që ata po punojnë sot. Si e zgjidhni ju duke i bërë vasalë të Skëndër Gjinushit?
Evis Kushi: Ju thoni me një të rënë të lapsit e mbyllni, po si moj me një të rënë të lapsit? Unë kam shkresat që në vitin 2021. I kam kërkuar që të riorganizohen në përputhje me ligjin. Nuk kanë pranuar që të riorganizuar. Të justifikojmë shkeljen e ligjit. Prej 8 vitesh nuk ka asnjë student, ligji e ka limitin për 2 vite. Kanë doktorantë prej shumë vitesh që nuk i çojnë dot drejt kurorëzimit me sukses. Kanë 12 vite me doktoraturën. Nuk po i hedhim në rrugë, por po i çojmë në institucione të ngjashme. Gjithçka transferohet. Ju po bëni sikur po i zhdukim, si? E thoni që i keni bërë nder Gjinushit, a thua se do e marri dhe do e çojë në shtëpi? Gjinushin e kanë zgjedhur pikërisht këta të ASA-s. Ju më akuzoni pse keni takuar Senatin, a thua se është shkelje ligji? Unë kam vlerësimin maksimal për ata studiues. Janë të ndëruar, por institucionalisht kanë dështuar.
