TIRANË– Zbardhet dëshmia e ish-kryebashkiakut të Durrësit Vangjush Dako përballë togave të zeza të Gjykatës së Posaçme Kundër Korrupsionit dhe Krimit të Organizuar (GJKKO) në një seancë që po vijon prej orësh. Dako ka treguar se nuk ka pasur dijeni dhe gjithçka ka qenë në dorën e specialistëve. Sipas tij kjo procedurë prokurimi publik është zhvilluar nga specialistët dhe se ai nuk ka qenë në dijeni.
Dako ka thënë para trupës gjykuese se nuk e ka shkelur kurrë ligjin dhe se kërkon një masë më të butë sigurie se ajo e “Arrestit me burg”. Ndërkohë avokati i tij mbrojtës Petrit Ismalili përpara gjykatës është shprehur se Dako nuk ka lidhje me akuzat. Ai ka kërkuar që ish-kreut të Bashkisë së Durrësit ti caktohet një masë më e butë sigurie si ajo e arrestit të shtëpisë ose detyrim paraqitjeje.
Seanca po vijon me dyer të mbyllura. Vangjush Dako u arrestua me urdhër të Prokurorisë së Posaçme Kundër Korrupsionit dhe Krimit të Organizuar (SPAK) nën akuzën e shpërdorimit të detyrës dhe falsifikimit të dokumeteve në lidhje me tenderin për projektin për zhvillimin e vijës bregdetare, nga zona e Brrylit deri në Currila ku sipas organit të akuzës vlera e dhënë është shumë herë më e lartë se kostot që projekti ka si dhe me lejën e ndërtimit të nja pallati 11 katësh.
