GJERMANI– 40-vjeçari, David W., i cili vrau nënën e tij në Gjermani dhe më pas hyri në ambientet e “Radio Dresden” duke terrorizuar qytetarët aty, ka ndërruar jetë në spital.
Lajmin e bëjnë të ditur mediat e huaja, të cilat rikujtojnë se 40-vjeçari vrau nënën e tij 62-vjeçare në një apartament në Dresden-Prohlis të shtunën në mëngjes dhe më pas hyri në një stacion radioje në qendër të qytetit, ku qëlloi me pistoletë dhe theu një derë.
Kur u thirr policia, ai hyri në një degë të DM në Altmarktgalerie, ku arriti të merrte dy persona peng, një grua dhe një fëmijë. Fatmirësith dy personat e marrë peng shpëtuan të padëmtuar.
Pak pas orës 12:00, policia ndërhyri dhe arriti të arrestonte autorin, për të cilin BILD tha se u qëllua nga oficerët. David W. u plagos rëndë dhe humbi jetën pak orë më vonë në spital, ndërkohë që policia e cilësoi autorin 40-vjeçar si person me probleme mendore.
