TIRANË– Deputeti i Partisë Demokratike Enkelejd Alibeaj i është përgjigjur “flakë për flakë” deklaratave të bëra këtë të premte nga kryedemokrati Sali Berisha se ai dhe Lulzim Basha nuk kanë vend në PD. Përmes një postimi në rrjetet sociale Alibeaj e cilëson Berishën si humbës të zgjedhjeve si dhe shton se ai tashmë është i rrënuar moralisht pas disfatës së 14 majit. Sipas Enkelejd Alibeajt Sali Berisha ka vetëm një zgjedhje, të largohet nga politika dhe të heshtë.
REAGIMI:
Humbësi i zgjedhjeve të 14 majit ka vijuar dhe sot serinë e përsëritjes së justifikimeve bajate që nuk ja hanë më as kandidatët dhe as besnikët e tij. I zhytur në mjerimin e mungesës së shpresës dhe alternativës, Sali Berisha vijon serinë e shpalljes së armiqve me shpifjet e zakonshme dhe banalitetin konstant, për të gjjthë ata që mendojnë ndryshe nga ai. I dëshpëruar por i palodhur nga përpjekja për të përçarë PD, i rrënuar moralisht por i paepur në përpjekjen për të mbajtur peng një pjesë të demokratëve, me ligësinë e dikujt që koha dhe veprat ia kanë shkruar fundin e palavdishëm, ndaj Sali Berishës ka vetëm një zgjidhje: të largohet i braktisur dhe të heshtë duke marrë me vete edhe atë fije dinjiteti, nëse i ka mbetur. Kështu demokratët do të fitojnë mundësinë për të qenë alternativë e re për shqiptarët. Duke lënë pas të shkuarën dhe pa ngarkesat e korrupsionit familjar dhe të shpurës së tij, pesha e të cilave i shërbejnë veçse Ramës e të ngjashmëve të tij për ta mbajtur gjallë në politikë dhe që i kanë lënë demokratët në opozitë.
