TIRANË– Prokuroria e Posaçme Kundër Korrupsionit dhe Krimit të Organizuar (SPAK) ka nisur verifikimet për hetimin e të arrestuarve si porositës dhe organizatorë të trafik të 430 kilogramëve kokainë të zbuluara në Fratar të Fierit. Mësohet se Prokuroria e Posaçme ka nisur shlkresat pranë institucioneve të regjistrimit të pasurive të luajtshme dhe paluajtshme.
Pas përmbylljes së fazës së parë të hetimeve për rastin e trafikut ku vuri në pranga Nikolin Gjolenën si financier dhe 9 persona të tjerë, tashmë kërkon të gjurmojë pasuritë e të arrestuarve por edhe të familjarëve të tyre për të zbuluar nëse mund t’i justifikojnë me burime të ligjshme, në të kundërt do t’u konfiskohen.
Deri më tani janë arrestuar: Zenel Cervanaku, i cili akuzohet se është edhe porositësi i kësaj sasie kokaine; Viktor Çervanaku, ish-kryekomunari Frakullit, djali i tij së bashku me të fejuarën, Denilson Çervenaku dhe Enxhi Ferhati, Klajdi Vrioni (Kodra), i dënuar më parë për armëmbajtje pa leje dhe për plagosje të rëndë; Redion Meshi, 22 vjeç; Marildo Rona, Nikolin Gjolena, Julian Malaj dhe Bledar Matoshi. Në kërkim është shpallur kolumbiani Zaimir Rodrigez, i cili dyshohet se kishte ardhur në Shqipëri për të bërë ndarjen e kokainës nga plehu kimik. Në kuadër të këtij operacioni u sekuestruan 15,910 Euro; 3 armë zjarri automatik kallashnikov; 3 armë zjarri të llojit pistoletë; 108 copë fishekë luftarake të kalibrave të ndryshëm; 18 aparate telefonash celulare; 5 automjete; 2 laptop dhe 2 armë gjahu.
