TIRANË– Kreu i Lëvizjes Bashkë Arlind Qorri deklaroi në emisionin “Stay Tuned” me moderatoren Valbona Mhilli se në parim forca politike që ai drejton është e hapur të bashkëpunoj me parti të reja, por ai thekson se ato duhet të tregojnë seriozitet dhe të luftojnë në terren jo të fokusohen vetëm në pjesën elektorale. Qorri thotë se partitë e vjetra e kanë nënvlerësuar Lëvizjen Bashkë, dhe janë frikësuar mbi të gjitha nga potenciali politik i kësaj force të re politike.
“Sa i takon partive të reja, ne jemi të hapur në parim të bashkëpunojmë me të gjithë, mirëpo në kushtet e ndershmërisë dhe seriozitetit. Ne nuk besojmë te bashkëpunimi përpara kamerave, te bashkëpunimi që fokusohet fund e krye te elektoralizmi, te kandidatura. Ne besojmë te bashkëpunimi në terren, aty ku luftohet për të drejtat e qytetarëve, aty ku i dilet oligarkut përballë, pushtetarit përballë, policit përballë, në emër të të drejtave të qytetarëve. Shpresoj që parti të tjera ta fitojnë seriozitetin e duhur për t’u ballafaquar politikisht në terren me të gjithë ata që po e zhbëjnë shoqërinë shqiptare nga dita në ditë. Politika për mua bëhet në rrugë. Kundërshtarët tanë duke na njohur mirë e dinë që me ne nuk funksionojnë taktikat e vjetra. Me ne përballja politike është e drejtpërdrejtë, publike. Për numëruesit e partive të vjetra ishte surprizë rezultati ynë. U bë si një lloj sporti, të shohim sa vota do marrë Lëvizja Bashkë. Mendoj që partitë e vjetra kanë qenë më te sigurta seç duhet në pozitat e tyre, mund edhe të na kenë nënvlerësuar, edhe kjo na ka ndihmuar që të godasim në shenjë në këtë betejë të parë politike. Sigurisht nuk do e kemi këtë ‘favor’ në zgjedhjet e tjera, sepse unë tani shoh që janë frikësuar mjaft nga rezultati ynë, por mbi të gjitha nga potencialet tona politike. Nga fakti që ne këtë rezultat mund ta shumëfishojmë shpejt, e për pasojë të mos jemi më thjesht surpriza e një palë zgjedhjeve, por një alternativë e vërtet qeverisëse”.
