TIRANË– Arbër Murataj, i shpallur në kërkim nga Policia e Tiranës si i përfshirë në vrasjen e 21-vjeçarit Stivens Toshkezi pak javë më parë është shoqëruar këtë të hënë në Drejtorinë e Policisë Tiranë për të dhënë dëshminë e tij në lidhje me ngjarjen. Raportohet se pasi ka dhënë deklaratën e tij ai është lënë i lirë. Para hetuesve ai ka deklaruar se nuk ka asnjë lidhje me ngjarjen.
Arbër Murataj, djali i Admir Muratoit, i vrarë gjatë grabitjes së Rinasit disa vite më parë u fut në listën e Policisë pas dëshmisë së dhënë nga e dashura e Stivens Toshkezit, e cila dyshohet të jetë dhe “molla e sherrit” me sdjemve. Ajo kishte deklaruar se Murataj bashkë me Axel Hoxhësn, ekzekutorin e 21-vjeçarit e ngacmonin vazhdimisht në rrjetet sociale. Sipas dëshmisë së vajzës pak javë para se të ndodhte vrasja Arbër Murataj e kishte plagosur me thikë Toshkezin në zonën e “Rrugës së Elbasanit”.
Ngjarja e rëndë u regjistrua mesnatën e 18 prillit në rrugën “Skënder Sallaku”. Stivens Toshkezi ishte duke u kthyer nga puna kur u përball me Axel Hoxhën dhe Ensi Mazen. Hoxha, i cili kishte thikë me vete e goditi disa herë Toshkesin. Ky i fundit arriti të shkonte me shenja jete ne spital por ndërroi jetë në duar të bluzave të bardha.
