TIRANË– Mustafa Nano, kandidati për Ambasador i Shqipërisë në Zvicer ka dalë këtë të hënë para Komisionit të Jashtëm në Kuvend ku ka paraqitur objektivat e tij për mandatin që do të shërbejë në Zvicër. Nano gjatë fjalës së tij u shpreh se ai dëshiron të jetë një Ambasador ndryshe nga të tjerët ndërsa kandidatura e tij u prit mirë dhe nga deputetët anëtarë në Komision nga të dyja krahët politik.
Diskutimet:
Mustafa Nano: Do doja të ishte një moment i vecantë në jetën time. Shpresoj që puna të jetë interesante. Në Zvicër ka një rreth të madh shqiptarësh. Do mbaj fokus të vecantë te detyra ime. Unë kam vendosur të jem më aktiv se ambasadorët e tjerë në botë. Unë do doja të isha më aktiv. Do doja që roli i ambasadorit të ishte më i madh. Do kuroj marrëdhëniet mes Shqipërisë dhe Zvicrës.
Kreshnik Çollaku: Më vjen mirë që vuri theksin te diaspora. E nxis dhe me entuziasmoi dëshira për këtë risi në diasporë. Me keqardhjen e madhe që Tiranës do t’i mungojë një studio ku ne flasim.
Agron Gjekmarkaj: Jemi munduar që Zvicrës ti gjejmë ambasadorë të qetë. Duhet ti kishim marrëdhëniet me cilësore, ndoshta duke dërguar atje një zhurmues do ketë ndryshim. Më vjen mirë që kemi ambasador dikë që ka shkruar libra. Shpresoj që Shqipëria të fitojë një ambasador cilësor. Besoj se ai është njeri i lirë dhe do jetë shërbëtor cilësor i vendit tonë.
Mustafa Nano: Ndihem i ledhatuar dhe i llastuar që po pritem mirë. Nuk kisha dyshime.
