TIRANË– Kandidati për Ambasador i Shqipërisë në Emiratet e Bashkuara Arabe Ridi Kurtezi ka dalë këtë të hënë përpara Komisionit për Politikën e Jashtme ku ka prezantuar kandidaturën e tij së bashku me objektivat që do e shoqërojnë gjatë mandatit. Gjatë fjalës së tij Kurtezi u shpreh se një nga prioritetet e tij është nënshkrimi i një marrëveshjeje ekstradimi me Emiratet e Bashkuara. Nisur kjo nga fakti se shumë kriminelë shqiptarë janë strehuar në Dubai si një vend i sigurt për aq kohë sa mes dy vendeve nuk ka një marrëveshje ekstradimi që do i sillte ata pas arrestimit në vend.
Ridi Kurtezi: Kuadri lidhor është i konsoliduar. Sa i takon marrëveshjeve në fushën penale janë pothuajse të papërfunduara. Por mesa lexoj nga dosjet ka filluar puna dhe roli im do jetë që të shtyhet më tej. Si për shembull marrëveshja e ekstradimit, që nuk është vetëm për ne por për shumë të tjera, do ta shoh me prioritet dhe e kam një nga objektivat e aktivitetit të ardhshëm në atë vend. E specifikova që do jetë prioritet marrëveshje në gjyqësor dhe në atë të ekstradimeve në veçanti. Pro varet si do shkojë ne perspektivë, sepse është e dyanshme.
