TIRANË– Tre persona kanë rënë në prangat e Policisë së Tiranës këtë të martë pasi akuzohen se sillnin në Shqipëri dokumente të shtetësive të huaja të falsifikuara. Përmes një njoftimi për mediat blutë e kryeqytetit bëjnë me dije se janë arrestuar M. H., 35-vjeç, Sh. H., 52-vjeç, dhe I. H., 34-vjeç, të tre banues në Tiranë. Pas hetimeve Policia zbuloi dhe se si funksiononte grupi. Kështu mësohet se Sh. H., dhe I. H., siguronin dokumentet e falsifikuara jashtë vendit, dhe më pas ja sillnin shtetasit M. H., kundrejt pagesës. Ky i fundit gjente klientë dhe i shiste në Shqipëri.
NJOFTIMI I POLICISË:
Finalizohet operacioni policor i koduar “Watermark”, për goditjen e veprimtarisë kriminale në fushën e falsifikimit të dokumenteve. Operacioni u zhvillua nga Seksioni për Hetimin e Krimeve Ekonomike dhe Financiare, në DVP Tiranë. Vihen në pranga 3 shtetas të cilët në bashkëpunim me njëri-tjetrin siguronin dhe sillnin në Shqipëri dokumente të shtetësive të huaja, të falsifikuara. Specialistët e Seksionit për Hetimin e Krimeve Ekonomike dhe Financiare, në vijim të punës për parandalimin, evidentimin dhe goditjen e paligjshmërive në fushën e krimeve ekonomiko-financiare, bazuar në inteligjencën informative se disa shtetas merreshin me falsifikime dokumentesh, kanë referuar materialet në Prokurori e cila ka regjistruar procedimin penal. Si rezultat i hetimeve proaktive të kryera në funksion të këtij procedimi penal është dokumentuar me prova ligjore kjo veprimtari kriminale dhe është finalizuar operacioni policor i koduar “Watermark”. Në kuadër të këtij operacioni u bë arrestimi i shtetasve: – M. H., 35 vjeç, Sh. H., 52 vjeç, dhe I. H., 34 vjeç, të tre banues në Tiranë. Shërbimet e Policisë kanë lokalizuar shtetasin M. H., në Kamzë, dhe gjatë kontrollit të dokumenteve i gjetën një dokument (patentë italiane) të dyshuar të falsifikuar. Nga veprimet hetimore ka rezultuar se shtetasit Sh. H., dhe I. H., siguronin dokumentet e falsifikuara jashtë vendit, dhe më pas ja sillnin shtetasit M. H., kundrejt pagesës, dhe ky i fundit gjente klientë dhe i shiste në Shqipëri. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
