TIRANË– Komisioni për Veprimtarinë Prodhuese ka miratuar këtë të martë projekt-rezolutën për vlerësimin e veprimtarisë vjetore të Autoritetit të Konkurrencës për vitin 2022. Gjatë fjalës së tij kreu i Komisionit Eduard Shalsi kërkoi nga Autoriteti i Konkurrencës që të përimrësojë punën në disa drejtime si dhe të ndëshkojë operatorët e tregut që shkelin konkurrencën.
Eduard Shalsi: Autoriteti i Konkurrencës duhet të monitorojë sjelljen e ndërmarrjeve të prekura nga transaksioni i përqendrimit në tregun e telefonisë celulare, në kushtet kur struktura e tregut ka ndryshuar tërësisht. Njëkohësisht, Autoriteti i Konkurrencës duhet të ndjekë përmbushjen e rekomandimeve të dhëna në tregjet e monitoruara apo hetuara gjatë 2002, si dhe të vlerësojë rast pas rasti sjelljen e ndërmarrjeve të cilat gëzojnë pozitë dominuese nëpërmjet marrëveshjeve koncesionare në fuqi, apo atyre të reja si projekti i investimit strategjik të Marinës dhe Jahteve të Durrësit. Të ndërmarrë një procedurë monitorimi apo hetimi në tregun e shërbimit spitalor privat, me qëllim vlerësimin e konkurrencës në këtë treg, në kushtet e ndryshimit të pronësisë së spitaleve private gjatë viteve të fundit. Të mbikëqyrë me prioritet dhe të dalë me rekomandime konkrete për tregjet sensitive dhe me impakt të drejtpërdrejtë në mirëqenien e konsumatorit shqiptar, të tilla si tregu i prodhimit të qumështit dhe nënprodukteve të tij, tregu i ushqimeve, sidomos artikujve bazë të shportës, tregu i karburanteve dhe ai i ndërtimit.
