TIRANË– Kryebashkiaku i zgjedhur i Himarës Fredi Beleri ka kërkuar këtë të mërkurë lirimin nga burgu në Gjykatën e Lartë. Mësohet se avokatët e tij e tij kanë dorëzuar kërkesën për rrëzimin e vendimit të Gjykatës së Apelit të Posaçëm Kundër Korrupsionit dhe Krimit të Organizuar që e la në arrest në burg. Ende nuk është caktuar se kur do të shqyrtohet kërkesa.
Ndërkohë po këtë të mërkurë Gjykata e Vlorës ka njohur mandatin e Fredi Belerit në Bashkinë e Himarës, të fituar nga zgjedhjet vendore të 14 majit.
“Gjykata e Shkallës së Parë të Juridiksionit të Përgjithshëm Vorë, vendosi vërtetimin e mandatit të kryetarit të Bashkisë Himarë, Qarkut Vlorë, Zoti Dhionisios (Alfred) Petro Beleri, i propozuar nga koalicioni “Bashkë Fitojmë” për zgjedhjet për organet e vetëqeverisjes vendore të zhvilluar më 14 Maj 2023”, thuhet në vendimin që mban firmën e gjyqtares Herila Cela.
Fredi Beleri u arrestua nga Policia e Vlorës një natë para zgjedhjeve vendore të 14 majit nën akuzën e “Korrupsionit aktiv në zgjedhje”. Çështja i kaloi për hetim Prokurorisë së Posaçme Kundër Korrupsionit dhe Krimit të Organizuar (SPAK). Pak ditë më parë Gjykata e Posaçme i caktoi masën e arrestit me burg ndërsa Komisioni Qëndror i Zgjedhjeve i dha mandatin e kryebashkiakut.
