TIRANË– Presidenti Bajram Begaj ka reaguar këtë të enjte në lidhje me rrëmbimin e tre efektivëve të Policisë së Kosovës nga forcat speciale serbe një ditë më parë. Përmes një deklarate zyrtare nga Presidenca Begaj bën thirrje për lirimin e menjëhershëm të efektivëve si dhe kërkon nga partnerët ndërkombërë që të ndërhyjnë për qetësimin e situatës së rënduar në veri të Kosovës.
Po ashtu Kreu i Shtetit shqiptar kishte dhe një thirrje për qeverinë e Kosovës. Begaj shprehet se autiritetet kosovare nuk duhet të bien pre e provokimeve nga ana e Serbisë dhe duhet të koordinohen me aleatët ndërkombëtarë.
Bajram Begaj: Rrëmbimi i tre efektivëve të Policisë së Kosovës brenda territorit kosovar nga trupat serbe është një akt i rëndë provokativ për destabilizimin e Kosovës dhe të mbarë rajonit. E dënoj me forcë këtë akt dhe i bëj thirrje autoriteteve Serbe për lirimin e efektivëve kosovarë. Gjithashtu iu bëj thirrje partnerëve ndërkombëtarë që të ndërhyjnë dhe të shkurajojnë veprime të tjera të ngjashme. Një thirrje vëllazërore e bëj sërish për autoritetet e Kosovës për të mos rënë pre e provokimeve dhe për të dhënë kontributin e tyre për çtensionimin e situatës. Koordinimi me SHBA dhe BE për rikthimin në tryezën e dialogut është tepër i rëndësishëm.
