GREQI– Detaje të reja kanë dalë në dritë në lidhje me vrasjen makabre të 27-vjeçare polake Anastasia Rubinskas, e cila shkoi në Greqi për pushime por u vra nga një 32-vjeçar nga Bangladesh. Ky i fundit është vënë në pranga nga Policia. Trupi i Rubinskas u gjet në zonën e Alykes, në një qese të mbuluar me degë, në një zonë rreth një kilometër nga shtëpia e 32-vjeçarit nga Bangladeshi që po mbahet nga policia.
Ai është personi që e ka parë për herë të fundit dhe që në momentin e parë është konsideruar i dyshimtë pasi ka rënë në shumë kontradikta gjatë marrjes në pyetje në polici. Personi nga Bangladeshi u ndalua nën akuzën e rrëmbimit, megjithatë hetimet po vijojnë. Lidhur me ngjarjen ka n që reaguar dhe familjarët e të resë.
Vëllai i viktimës: Do të doja dhjetë minuta të takohesha me këtë njeri dhe ta “përfundoja” vetë. Sigurisht që nuk mendoj se ishte një aksident. Nuk mund të them asgjë tjetër. Le të bëhet drejtësi. Personat që e kanë bërë duhet të dënohen siç e meritojnë. Më vjen keq për familjen time, por shpresoj se vrasja e saj do të jetë një paralajmërim për vajzat e tjera kur ato janë në vende të tjera, që të shikojnë shoqërinë e tyre dhe të jenë më të kujdesshme.
Dëshmitë e nxjerra nga analiza e materialit janë gjithashtu të rëndësishme, pasi ADN-ja e Anastasia u gjet në shtëpinë e të riut nga Bangladeshi. Ndërkohë këtë të hënë kryeministri i Polonisë Mateusz Morawiecki informoi se do t’i kërkojë Greqisë ekstradimin e të dyshuarit për vrasjen e 27-vjeçares Anastasia.
Mateusz Morawiecki: Jam i tronditur nga vrasja mizore e 27-vjeçares Anastasia. Autori duhet të përballet me pasoja shumë të rënda. Prandaj do t’i kërkojmë Greqisë të dorëzojë të dyshuarin për t’u gjykuar në një gjykatë polake dhe për t’i dhënë dënimin maksimal të mundshëm.
