BERAT– Prej dy ditësh tashmë qarku i Beratit është përfshirë nga moti i keq me reshje të dendura shiu, të cilat kanë shkaktuar dhe probleme në rrugët e qytetit.
Ndërkohë kur e gjithë qyteti është nën ‘pushtetin’ e shiut në malin e Tomorrit ka rënë dëbora e parë.
Mësohet se, njësia administrative e Gjerbësit është bllokuar pasi ka pasur rrëshqitje të gurëve dhe dherave. Autoritetet po punojnë për zhbllokimin e rrugës Dëvri-Gjerbs.
Ndërsa reshjet kanë fryrë përrenjtë e prurjet e tyre kanë çuar lumenjtë drejt pikës së rrezikut ku është dhënë alarmi për gatishmëri pasi mësohet se në urën Pasarel Berat uji ka kaluar parametrat. Deri më tani nuk ka përmbytje të tokave bujqësore.
