ELBASAN– Një 46-vjeçar i identifikuar me inicialet B.P është është raportuar i zhdukur këtë të enjtë në Elbasan ndërsa dyshimet janë se ai mund të jetë marrë nga rrjedha e lumit Shkumbin. Denoncimin për zhdukjen e tij në Polici e kanë dhënë familjarët të cilët shprehen se 46-vjeçari kishte dalë pasditën e dy ditëve më parë për të punuar tokën por nuk ishte kthyer. Kjo ka vënë në alarm Policinë të cilët janë vënë në kërkim të tij.
NJOFTIMI I POLICISË:
Mëngjesin e djeshëm, shtetasi P. P. ka njoftuar sallën operative, se vëllai i tij, shtetasi B. P., 46 vjeç, gjatë mbrëmjes së datës 20.06.2023, kishte qenë duke punuar një sipërfaqe toke, buzë lumit Shkumbin, dhe nuk ishte kthyer më në banesë. Gjithashtu, familjarët e shtetasit B. P. kanë deklaruar se dyshojnë se 46-vjeçarin mund ta ketë marrë aksidentalisht rrjedha e ujit, gjatë kohës që ka tentuar për të kaluar në kahun tjetër të lumit, për t’u kthyer në banesë. Menjëherë pas marrjes së njoftimit, shërbimet e Policisë së bashku me familjarët, kanë nisur kërkimet përgjatë shtratit të lumit Shkumbin. Gjithashtu, krahas shërbimeve të Drejtorisë Vendore të Policisë Elbasan, janë angazhuar edhe polumbarët e Repartit Special RENEA, të cilët vijojnë kërkimet në të gjithë rrjedhën e lumit, me qëllim gjetjen e trupit të 46-vjeçarit.
