TIRANË-Ish-kryebashkiaku i Kukësit Safet Gjici është arrestuar pak minuta më parë me urdhër të Gjykatës së Posaçme Kundër Korrupsionit dhe Krimit të Organizuar (GJKKO) për akuzën e “Korrupsionit pasiv”. Vendimi i GJKKO-së erdhi pas kërkesës së bërë nga Prokuroria e Posaçme (SPAK). Arrestimi i Gjicit vjen pas video-skandalit ku ish-kryebashkiaku i Kukësit shfaqej duke kryer marrëdhënie seksuale në zyrën e tij me një vajzë.
Pozita e tij u rëndua pasi ai pas aktit seksual i dha vajzës së identifikuar si Alma.K një tender në bashki që kishte të bënte me sterelizimin e qenve të rrugës. Me këtë akuzë të ngritur nga prokurorja Manjola Kajana, Gjici rrezikon deri në 7 vite burg por se kjo varet nga ajo se si do të shkojë çështja ndaj tij.
Safet Gjici u shfaq në një video-skandal më datë 16 qershor teksa kryente marrëdhnie seksuale me një vajzë në zyrën e tij në Bashkinë e Kukësit. Pas kësaj ai dha dorëheqjen duke pretenduar se i kanë ngritur kurth ndërsa pak orë më vonë ai u shkarkua nga detyra me vendim të Këshillit të Ministrave. Pozitat e Safet Gjiciu u rënduan më tej pasi pas aktit seksual ai bisedoi me vajzën për një tender për qentë e rrugës që vajza do ta përfitonte pa u futur në garë. Me sa duket kjo e ka fundosur pozitën e Gjicit që tashmë do të përballet me SPAK. Video-skandali solli reagime të shumta dhe trazoi jetën politike në vend. Ndërkohë zgjedhjet në Bashkinë e Kukësit do të përsëriten.
