VLORË– Një 62-vjeçar i identifikuar me inicialet M.V është vënë në prangat e Policisë së Vlorës këtë të hënë pasi akuzohet për ndërtim të paligjshëm. Sipas Policisë 62-vjeçari kishte ngritur 2 objekte prej druri pa lejën përkatëse. Materialet i kaluan Prokurorisë për hetime të mëtejshme.
NJOFTIMI I POLICISË:
Vlorë/Vijojnë kontrollet në të gjithë vijën bregdetare të qarkut, me qëllim konstatimin e ndërtimeve të paligjshme. Kishte nisur pa qenë i pajisur me leje, punimet për ndërtimin e një lokali në plazhin e Jonufrit, arrestohet 62-vjeçari. Si rezultat i kontrolleve dhe i verifikimeve në terren, me qëllim parandalimin, konstatimin dhe goditjen e paligjshmërive në fushën e ndërtimeve, veçanërisht të atyre në zonat urbane dhe në ato bregdetare, shërbimet e Komisariatit të Policisë Vlorë, bazuar në informacionet e siguruara në rrugë policore, kanë goditur një tjetër rast të paligjshmërive në këtë fushë. Gjatë kontrolleve u konstatua se shtetasi M. V. kishte ngritur 2 objekte prej druri, në funksion të ndërtimit pa lejen e organeve kompetente, të një lokali në plazhin e Jonufrit. Në vijim të veprimeve procedurale për këtë rast, specialistët për Hetimin e Krimeve të Komisariatit të Policisë Vlorë arrestuan shtetasin M. V., 62 vjeç, banues në Vlorë, për veprën penale “Ndërtimi i paligjshëm”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm, për veprime të mëtejshme.
