TIRANË– Regjisori Altin Basha nga sot do të jetë dhe drejtori i ri i Teatrit Kombëtar. Vendimi u mor ditën e sotme në mbledhjen e Këshillit të Ministrave. Altin Basha mundi në garë regjisorët Elma Dorezi, Kiço Londo (drejtor i Teatrit Shëtitës “Çajupi”) dhe aktorin Arben Derhemi.
Ndërkohë Hervin Çuli, i cili qëndroi për dy mandate në drejtim të Teatrit Kombëtar, e deklaroi që në krye të garës, se nuk do të merrte pjesë.
VENDIMI:
Në mbështetje të pikës 2, të nenit 100, të Kushtetutës, e të pikës 3, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Kulturës, Këshilli i Ministrave
Vendosi
1. Z. Hervin Çuli, drejtor i Teatrit Kombëtar, lirohet nga kjo detyrë.
2. Z. Altin Basha emërohet drejtor i Teatrit Kombëtar.
Ky vendim hyn në fuqi menjëherë dhe botohet në “Fletoren zyrtare.
