TIRANË– Kryetari i Partisë Demokratoike Sali Berisha ka bërë me dije se komisioni i ngritur në PD për hetimin e asaj që ai e quan “farsë elektorale” në zgjedhjet e 14 majit e ka përfunduar raportin dhe ai do publikohet javën që vjen. Gjatë fjalës së tij në konferencën e përjavshme me gazetarët ai u ndal dhe tek çështja “McGonigal” ku tha se në gjyq ka prova fatale për kryeministrin Edi Rama.
Sali Berisha: Si gjithnjë, kryefjalë e bisedave të mia me ju është farsa elektorale. Dua t’ju informoj ju se raporti për farsën elektorale është i përfunduar.
Shumë shpejt, në fillim të javës që vjen ai do paraqitet para jush dhe opinionit publik shqiptar. Ndërkohë është paraqitur dhe vazhdon të paraqitet para opinionit publik ndërkombëtar. Ky raport, i bazuar në qindra dhe mijëra fakte, dëshmon se me 14 maj u zhvillua farsa më e turpshme elektorale pas diktaturës komuniste në Shqipëri dhe Europë. Ky raport dëshmon se zgjedhjet e vitit 2023 ishin një proces totalisht i kontrolluar nga qeveria, një proces në të cilin shqiptarët votuan në një presion si kurrë më parë në 32 vite. Ndaj, duke qenë në përfundim të këtij raporti, u informoj se ai do paraqitet para jush si një ekspoze tërësore. Pastaj ka një projekt që do paraqitet qark pas qarku, të gjitha problematikat e mëdha. Qëllimi është një dhe vetëm një, ndërgjegjësimi në respekt të votës së lirë, i qytetarëve shqiptarë për atë që ndodhi me votën e tyre. Vetëkuptohet se rezultate false, PD nuk do njohë kurrë. Ka zhvillime të rëndësishme nga procesi McGonigal. Duhet të theksoj se ky dokument publik informon se ka zbulime të reja. Më 24 korrik të vitit 2023, palët- thotë dokumenti, do mund të njihen, të shqyrtojnë zbulimet e reja. Sikundër ka edhe një shprehje fatale për Edi Ramën se thotë se qeveria po vazhdon të sjellë zbulime. Kur thotë qeveria, është fjala për prokurorin, sepse prokuroria është degë e Ministrisë së Drejtësisë në sistemin amerikan. Këto zbulime tregojnë se qeveria duket e interesuar për ta përfshirë këtë çështjen e McGonigal në Uashington të Edi Ramës me çështjen ruse, të agjenturës ruse në Nju Jork. Pse u ndala në këtë moment? U ndala sepse ju keni konstatuar disa veprime të pakontrolluara, të papërgjegjshme të Edi Ramës, në mënyrë që të krijojë me çdo kusht përpara datës 26 korrik, rrethana lehtësuese. Por e vërteta është se koha po punon për rrethana rënduese. Qartësisht rënduese, sepse vetë fakti që kërkohet shkrirja e dosjeve në një, mbi bazën e zbulimeve të reja, tregon se Edi Rama ka dalë shumë i implikuar. Këtë problem desha të sjell përpara publikut, sepse para disa ditësh kur unë bëra prononcimin ditën e martë, nuk arrita ta zbërthej këtë dokument siç duhet, veçanërisht pjesën e zbulimeve të reja.
