TIRANË– Kryetari i Partisë Demokratike Sali Berisha ka mbledhur këtë të hënë grupin parlamentar të PD. Kjo mbledhje vjen pak minuta para se Kuvendi të nisë seancën plenare ku do diskutohet puna e institucioneve të drejtësisë. Gjatë fjalës së tij Berisha tha se mazhoranca socialiste nuk merr në shqyrtim propozimin e PD për ligjin e lustracionit ndërsa shtoi se po bëjnë gjueti shtrigash.
Sali Berisha: Rregullat parlamentare bllokohen pa arsye ligjore, por kryekëput politike për të opozitën në Parlament. Siç e dini, janë një sërë nismash të grupit parlamentar, të cilat kanë muaj e muaj që mbahen në sirtarët e Lindës së Parlamentit me urdhër të Edi Ramës në mënyrën më absurde, më të padrejtë, dhe vazhdohet sikur nuk ndodh asgjë. Prej mbi 6 muajsh ne kemi dërguar në Kuvend ligjin e Lustracionit. Ai ligj jo vetëm identifikon deputetët, gjykatësit, prokurorët, zyrtarë te lartë për bashkëpunimin e tyre të dikurshëm, ose jo me Sigurimin e Shtetit, por ai detyron largimin nga shërbimi, nga detyra i atyre që dalin se kanë qenë bashkëpunëtorë të Sigurimit. Ky ligj është aplikuar në vitin 1996. Në vitin ’97 nuk është hedhur poshtë ky ligj. Në vitin 2008 ne rikthyem në Kuvend ligjin e Lustracionit. Gjykata Kushtetuese, me kërkesë të Ramës e hodhi poshtë ligjin në mënyrë antikushtetuese. Lustracioni, apo largimi i ish-sigurimsave u sanksionua në Kushtetutë. Çfarë duan të bëjnë? Këta duan të bëjnë gjahun e shtrigave sepse nuk pranojnë ligjin e Lustracionit, që është i plotë, gjithëpërfshirës. Ata duan të vendosin amendamente vetëm në kodin zgjedhor, në ligjin e dekriminalizimit. Duan që të shpëtojnë për të mbajtur peng gjykatës dhe prokurorë që nuk kanë ikur, që vettingu do i nxirrte nga shërbimi.
