KRUJË– Shënjestra e atentatit në Larushk të Krujës pak pas mesnate ka qenë Gentjan Bejtja por atentatorët gabuan objektiv dhe ekzekutuan kunatin e tij Ramazan Sinon, 47 vjeç dhe i plagosën djalin Alvi Bejtja 18 vjeç. Ngjarja ndodhi në oborrin e shtëpisë së Gentian Bejtjes.
Kush është Gentian Bejtja dhe e shkuara e tij kriminale
Gentjan Bejtja nuk është në emër i panjohur pë Policinë dhe drejtësinë si dhe ia ka dalë ti shpëtojë disa atentateve kundër tij. Bejtja u qëllua me armë zjarri së bashku me Klodian Stafukën mbrëmjen e 9 Janarit 2022. Ata zëu qëlluan teksa lëviznin me makinë pranë shkollës së fshatit Larushk në zonën e Fushë Krujës, ndërsa Bejtja mbeti i plagosur në krah.
Në shtator të vitit 2016, ndaj tij është organizuar një atentat me tritol. Bejtja po udhëtonte me makinën e tij tip “Tuareg”, me targë “AA 020 BH”, në fshatin Nikël të Krujës, kur nga poshtë mjetit shpërtheu eksplozivi që e dëmtoi rëndë në këmbë. Gjithashtu, Bejtja ishte personi që së bashku me Enver Stafukën vodhën makinën e përdorur në vrasjen e kryekomisar Dritan Lamajt në vitin 2013.
NJOFTIMI I POLICISË:
Krujë/Informacion paraprak. Më datë 04.07.2023, rreth orës 00:15, në fshatin Larushk, në Krujë, në oborrin e banesës së shtetasit G. B., në rrethana ende të paqarta janë qëlluar me armë zjarri shtetasit R. S., 46 vjeç dhe A. B., 18 vjeç, (dajë e nip). Si pasojë e plagëve të marra ka ndërruar jetë shtetasi R. S., ndërsa shtetasi A. B., ndodhet në spital, nën kujdesin e mjekëve. Shërbimet e Policisë pas marrjes së njoftimit kanë shkuar menjëherë në vendngjarje, kanë rrethuar zonën, kanë ngritur pika kontrolli dhe vijon krehja e zonës për të bërë të mundur kapjen e autorit/ëve. Në Tapizë, te lapidari, rreth orës 00:40, është gjetur duke u djegur një automjet dyshohet tip “Volkswagen”. Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit/ëve.
