Analisti Fatos Lubonja ka folur më tepër rreth ceremonisë së djeshme e cila u zhvillua për pritjen e Presidentit të SHBA-së, Bill Clinton. Fatosi shprehet se ndjehej shumë i turpëruar në mesin e njerëzve që ndodheshin në atë takim, pasi sipas tij të gjithë dukeshin si një popull trushpërlarë.
“U ndjeva keq për popullin shqiptar, sepse mu kujtua ajo koha kur vinte Hrushov… kur mblidhej gjithë populli dhe priteshin sikur kishte ardhur Zoti mbi tokë. Kjo ishte fryma, një popull që i shpëlahen trutë, një provincë e mjerë që nuk ka zhvilluar dot një mendim kritik. Mban një fjalim të turpshëm për mendimin tim për shkak të përmbajtjes, por më turp më erdhi kur rreshtuan ata fëmijët e shkretë me emrat Hillary dhe Clinton. Fatkeqësia është që ka njerëz që u duket shumë e bukur kjo, por mua më kujtoi ata fëmijët që merrnin emrin e Stalinit, Hilterit, dhe nuk kanë emrat e gjyshërve të tyre. Duhet të jesh shumë vend i papjekur për të bërë këto akte. Kjo vizitë i shërbeu kryeministrit Rama, dhe politikave të tij që në momentin aktual janë të përqendruara për të kundërshtuar dhe luftuar Albin Kurtin, i cili përfaqëson një pushtet që është në kundërshtim me pushtetin që mban në këmbë Edi Ramën, që janë oligarkia, krimi i organizuar, mediat ku investojnë dhe partnerët ndërkombëtar,”- tha Lubonja
