TIRANË– Pamjet që po shihni tregojnë momentin kur “i forti” i Niklës Valter Bami mbërrin i prangosur në ambientet e Policisë së Tiranës pasi u arrestua për armëmbajtje pa leje. Ai mbetet një nga të dyshuarit kryesorë për atentatin ndaj Gentian Bejtjes në Larush të martën por që mbetën të plagosur dy djmetë e tij të mitur si dhe u vra kunati i Bejtjes, Ramazan Sino.
Sipas Policisë, ekspertët kanë gjetur në duart e tij faktorë plotësues në lidhje me ngjarjen, duke përfshirë mbetje baruti, që tregojnë se ka përdorur armë. Bashkë me të janë shoqëruar mbrëmjen e sotme edhe dy miq të Valter Bamit, si persona që mund të kenë dijeni për ngjarjen.
NJOFTIMI I POLICISË:
Në vijim të veprimeve hetimore në lidhje me ngjarjen e datës 03.07.2023, ku në fshatin Larushkë, Krujë, në oborrin e banesës së shtetasit G. B., është qëlluar me armë zjarri e si pasojë ka humbur jetën shtetasi R. S. Rreth orës 04:00 të po kësaj date, është shoqëruar shtetasi V. B., 37 vjeç, të cilit i janë marrë faktorët plotësues dhe deklarim në lidhje me ngjarjen e mësipërme e më pas është lënë i lirë, ju informojmë se:
Sot me datë 06.07.2023, bazuar në përgjigjen e aktit të ekspertimit kimik, ka rezultuar se në dorën e majtë të shtetasit V. B., janë konstatuar faktorë plotësues të qitjes me armë zjarri. Mbi bazën e këtij akti ekspertimi, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka lëshuar sot më datë 06.07.2023, urdhrin e ndalimit për këtë shtetas për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal. Po sot, rreth orës 20:30, në fshatin Greps, Nikël, është lokalizuar, kapur dhe shoqëruar në ambientet e DVP Tiranë shtetasi V. B., 37 vjeç, banues në Nikël, Fushë Krujë. Ndërkohë vazhdojnë intensivisht hetimet për dokumentimin e plotë ligjor të ngjarjes së mësipërme.
