TIRANË– Shtyhet sërish seanca gjyqësore ndaj ish-ministrit Fatmir Mediu në Gjykatën e Posaçme Kundër Korrupsionit dhe Krimit të Organizuar.
Shkak për shtyrjen u bënë prokurat për 109 viktimat e Gërdecit. Ndërkohë, Gjykata nuk legjitimoi avokatin Dorian Matlija për të mbrojtur 109 familjarë të viktimave apo të dëmtuar nga vepra penale. Seanca e radhës do të mbahet me 18 Korrik në orën 14:00.
Avokati: Gjykata do prokura të reja, do i sjellim.
Prokuroria e Posaçme Kundër Korrupsionit dhe Krimit të Organizuar (SPAK) kërkoi rigjykimin e Mediut, pasi e akuzon si një nga ish zyrtarët përgjegjës për tragjedinë e Gërdecit, me 26 të vrarë dhe qindra të plagosur. Gjykata e Lartë vendosi t’ia dërgojë këtë çështje për kompetencë GJKKO-së, me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë.
