TIRANË– Moderatorja dhe autorja e emisionit “Stay Tuned” në MCN TV dhe drejtuesja e Newszone.al ka rrëfyer detaje nga karriera e saj në media por dhe për personin që i ka qëndruar më pranë gjatë viteve të fillimit që ishin dhe më të vështirat për të. E ftuar në emisionin “7 pa 5” Mhilli rrëfeu mes lotësh fillimet e saj dhe si babai, i cili prej 2 vitesh është ndarë nga jeta i qëndronte pranë, e shoqëronte në audicione dhe e priste kur ajo mbaronte emisionin e saj.
Valbona Mhilli: Familja ime ka qenë gjithmonë mbështetëse dhe një nga mbështetësit e mi më të mëdhenj edhe sot dhe jam e bindur që ekziston energjia e tij kudo ku këmba ime shkel, është im atë, i cili më ka ndihmuar që në fillesat e para. Pavarësisht se punonte me orë të zgjatura, sa vinte nga puna më dërgonte në audicione, më priste derisa unë të mbaroja emisionin, më dërgonte në shtëpi. Kanë qenë kohë të vështira ato kohë, nuk ka qenë situatë e mirë për vajzat që të liheshin vetëm në rrugët e Tiranës. Sakrifica të mëdha ka bërë im atë që unë të isha pjesë e ekranit. Kur më ka parë për herë të parë në ekran ai ka thënë se ishte dita më e lumtur në jetën e tij. Unë edhe sot e kësaj dite, që në momentin që kam humbur babanë tim e ndjej energjinë e tij. Më përpara kur kisha babanënë krah kisha disa peripeci, sot prezenca e tij shpirtërore, hyjnore ma ka bërë çdo gjë më të thjeshtë.
