TIRANË– Kryeministri Edi Rama refuzoi të jepte opinionin e tij në lidhje me akuzat e ngritura ndaj ishi-ministrit të Ekonomisë dhe ish-numrit dy të qeverisë Arben Ahmetaj. Në një prononcim me gazetarët Rama tha se nuk do të fliste për këtë çështje deri në momentin që do të përfundonin hetimet e SPAK.
Kreu i qeverisë tha se nësë dikush, në këtë rast duke iu referuar ish-zëvendësit të tij ka ‘këputur dardha për t’i futur në trasta pas shpinës time, punën e ka me drejtësinë’.
Edi Rama: Respekti im për median në raport me të vërtetën është i mirënjohur. Media është e dyndur nga gjysmë të vërteta. Në rastin konkret bëhet fjalë për diçka, një denoncim që një individ i caktuar ka bërë në SPAK. Ne as për njerëz që janë kundër PS as për ish kryeministrja etj etj, nuk e kemi zakon të prononcohemi. Unë të gjitha që thuhen në media i marr me shumë rezervë. Të vërtetat individuale të gjithësecilit, janë individuale. Janë tre vepra, në Fier, në Elbasan dhe në Tiranë për të cilat 100 herë të kthehesha mbrapsht, 100 herë do thoja se duhej të ishin bërë. Ajo e Elbasanit, është pronë e komunitetit tanimë, ajo e Fierit është e destinuar të jetë pronë e komunitetit. Ajo e Tiranës e ka shpëtuar kryeqytetin nga plehrat. Nëse ne nisemi në betejë dhe rrugës dikush këput edhe dardha e mollë për t’i futur në trasta pas shpinës time, kjo është një çështje që ka të bëjë me drejtësinë. Nuk mund të bëhen spekulime dhe komente mbi copa të dhënash të cilat janë të gjitha për t’u hetuar. Kur të hetohen dhe nëse do ketë një vendim mbi to, atëherë unë do flas përsëri siç kam folur gjithmonë
