TIRANË– Deputeti i Partisë Demokratike Gazment Bardhi ka këkruar këtë të hënë që të mblidhet sa më shpejt Këshilli i Rregullores dhe Mandateve për ti hapur rrugë kërkesës së SPAK për arrestimin e ish-ministrit Arben Ahmetaj. Përmes një reagimi në rrjetet sociale Bardhi sugjeron SPAK që të nisë hetimet edhe për kryeministrin Edi Rama ndërsa kërkesën për arrestimin e Ahmetajt e cilëson të drejtë por të vonuar.
Gazment Bardhi: Kërkesa për të çuar Arben Ahmetaj para drejtësisë për aferën korruptive të incineratorëve është një veprim i drejtë, por i vonuar dhe i paplotë. SPAK duhet t’i shkojë deri në fund kësaj afere, duke bërë një hetim të plotë dhe të gjithëanshëm deri tek kreu i aferës korruptive, Edi Rama. Së bashku, ata kanë kryer disa nga veprat më monstruoze të korrupsionit qeveritar në 3 dekadat e fundit. I kërkoj kryetares së Kuvendit të mbledhë pa vonesë sot Këshillin e Mandatave. SPAK-ut i duhet dhënë menjëherë akses për kontrollin personal dhe të banesës së ish zëvendëskryeministrit.
