TIRANË– Ish-kryebashkiaku i Kukësit Safet Gjici ka kërkuar këtë të martë lirimin nga burgu. Kërkesa e bërë nga avokatët e tij do të shqyrtohet më 14 korrik në orën 11:00 në Apelin e Posaçëm Kundër Korrupsionit dhe Krimit të Organizuar. Gjyqtare e çështjes është caktuar Saida Dollani. Safet Gjici ka kërkuar një masë më të butë sigurie se ajo e arrestit me burg dhënë nga GJKKO.
Safet Gjici u shfaq në një video-skandal më datë 16 qershor teksa kryente marrëdhënie seksuale me një vajzë në zyrën e tij në Bashkinë e Kukësit. Pas kësaj ai dha dorëheqjen duke pretenduar se i kanë ngritur kurth ndërsa pak orë më vonë ai u shkarkua nga detyra me vendim të Këshillit të Ministrave. Pozitat e Safet Gjicit u rënduan më tej pasi pas aktit seksual ai bisedoi me vajzën për një tender për qentë e rrugës që vajza do ta përfitonte pa u futur në garë. Me sa duket kjo e ka fundosur pozitën e Gjicit që tashmë do të përballet me SPAK. Video-skandali solli reagime të shumta dhe trazoi jetën politike në vend. Ndërkohë zgjedhjet në Bashkinë e Kukësit do të përsëriten.
