TIRANË– Diskutimet për projektligjin e qeverisë që i hap rrugë legalizimit të kanabist mjekësor ka qenë tema e ditës në debatet parlamentare të kësaj të mërkure në Kuvend me përfaqësuesit e grupeve të interesit dhe ministren e Shëndetësisë Ogerta Manastirliu.
Kështu gjatë mbledhjes së Komisionit të Ligjeve deputeti demokrat Saimir Korreshi ironizoi qeverinë duke thënë se nuk duhej të ishte hartuar pa marrë mendimin e “çunave të Londrës”, të cilët sipas demokratit do të jepnin eksperiencën e tyre për kultivimin e kanabisit.
Saimir Korreshi: E mira është ti marrim se bëjnë rolin e agronomit, pse i lëmë në emigrim vijnë këtu. Lazarati është një shkallë më lart, ka nis tek ABZHR tani. Grupet e interesit, çunat që rrinë në Londër që punojnë shpi bari gjynah të vijnë me eksperiencë, farën e kanë, të zgjedhin llojin e farës, të japin mendim për mënyrën si jepet rendimenti. A po flasim për hashashin tani.
Më përgjigje ministrja Manastirliu iu drejtua Korreshit duke i thënë se fjalime të tilla po konfuzon publikun, pasi është thejsht një kuadër ligjor që ka të bëjë me kultivimin e kontrolluar të kanabisit nga shteti për qëllime industriale edhe mjekësore.
Ogerta Manastirliu: Po flasim për krijimin e një kuadri ligjor që ka të bëjë me kultivimin e kontrolluar nga shteti për qëllime industriale edhe mjekësore. Çfarë është në shkelje të këtij kuadri ligjor mbetet e paligjshme dhe nuk po legalizohet paligjshmëria, por ngrihet një kuadër i ri ligjor për hapjen e një sektori në ekonomi, që i përket kontrollit të kultivimit të kanabisit për qëllime mjekësore dhe industriale. I ka të përcaktuara të gjitha dispozita. Çdo gjë tjetër që thuhet për të konfuzionuar publikun është e pavërtetë.
