TIRANË– Komisioni Qëndror i Zgjedhjeve ka vendosur në mbledhjen e kësaj të premteje të delegojë kompetencën për akreditimin e vëzhguesve të subjekteve zgjedhore për përsëritjen e zgjedhjeve për Rrogozhinën te Komisioni të Zonës së Administrimit Zgjedhor nr. 43, Bashkia Rrogozhinë. Po ashtu Kryekomisioneri plotësoi vakancën në Këshillin e Bashkisë Gramsh, me kandidaten nga lista e “Partisë Socialdemokrate”, Erisa Zogu.
Zgjedhjet në Bashkinë e Rrogozhinës do të përsëriten pas vendimit të Kolegjit Zgjedhjor që hasi një numër të lartë parregullësish pas denoncimit dhe ankesave të bëra nga koalicioni “Bashkë Fitojmë”. Zgjedhjet do të mbahen më 23 korrik dhe në garë do të jenë sërish të njëjtët kandidatë, Edison Memolla nga Partia Socialiste dhe Shkelqim Hoxha nga koalicioni “Bashkë Fitojmë”.
