TIRANË–I nxehti afrikan ka ‘paralizuar” Evropën këtë javë. Temperaturave ekstreme nuk u ka shpëtuar as vendi ynë, i cili po përballet me temperatura të larta, të cilat këtë fundjave pritet që të arrijnë deri në 42 gradë celsius. Këtë e bëri me dije sinoptikani Hakil Osmani në një lidhje në News 24.
Hakil Osmani: Sot dhe nesër mbetemi me temperatura të larta. Gjatë kësaj fundjave qytetet me temperaturat më të larta do të jenë Elbasani, Berati dhe Fieri. Por temperatura të larta do të kenë dhe qytetet e tjera të Shqipërisë. Bregdeti parashikohet me temperatura 36-37 gradë celsius. Nga e hëna deri të shtunën temperaturat do të jenë shumë të larta, vlera shumë pranë 42 gradë celsius, në ndonjë zonë të Elbasani dhe mbi 42. Kjo valë e të nxehtit do të vijojë deri në fund të muajit dhe do të sjellë temperatura të larta dhe shumë të larta. Rritje e ndjeshme edhe e temperaturave të mëngjesit.
