TIRANA– “Në momentin kur u zgjodh Albin Kurti kam thënë se nuk do merret me zhvillimin e Kosovës, por vetëm me konfliktin me Serbinë dhe kështu ka ndodhur.” Një deklaratë e tillë vjen nga Dritan Shano, i cili në emisionin “Stay Tuned” me moderatoren Valbona Mhilli në MCN TV thotë se Bill Clinton dha mesazhin e duhur se ai është krijuesi i Kosovës dhe e di shumë mirë pse janë krijuar katër komuna në Veri të Kosovës, për bashkëjetesë.
Sipas tij, Kosova nuk duhet të jetë simetrike me serbët, por se duhet të jetë shembull i bashkëjetesës, dialogut dhe mirëkuptimit. Ai ndan bindjen se Kosova me Albin Kurtin këtë shembull e ka humbur.
“Mendoj se politika e jashtme e Republikës së Shqipërisë duhet të jetë Kosova, A-ja e kësaj gjëje. Interesi i kombit shqiptar në mënyrën si zhvillohen këto vende para se të arrihet në patriotizmat e shekullit 19-të. Mendoj se pamja që ka marrë marrëdhënia mes Shqipërisë dhe Kosovës është e paduhur, është marrëdhënie mes dy individësh që nuk e durojnë njeri tjetrin dhe jo një marrëdhënie mes shtetesh, ekonomisë dhe shoqërisë shqiptare dhe kosovare që gjithnjë tentojnë të afrohen me njeri tjetrit. Këta dy individë njëri diku ka të drejtë diku jo, i kanë dhënë pamjen e një sherri bulevardi, sherri çuna lagjesh, nga kjo nuk fitojë as kosovarët as shqiptarët.”
Shano tha ndër të tjera se peshën e rëndë në Ballkan e ka Serbia, është ekonomia më moderne dhe se e Greqisë dhe se do ishte e gabuar që dikush të mendoj se është lideri i Ballkanit.
“Arsyeja pse nuk e kam dashur Ballkanin e Hapur është se tentonte të zëvendësonte për të kënaqur egon e Ramës dhe Vuçiç një organizatë që i ka zyrat në Bruksel, CEFTA, që është shumë më e kompletuar. E vetmja gjë që bëri Ballkani i Hapur është që e mbyti tregun shqiptar me mallra serbe.”
Shano deklaroi se Edi Rama është i plotfuqishëm sot në Shqipëri dhe se gjithë ndryshimet kushtetuese nga 2008 e mbas tentojnë drejt plotfuqisë së Kryeministrit.
“E kanë bërë Presidentin një pozicion honorifik, dhe gjithçka tjetër në Shqipëri është një republikë kryeministrore, nuk është një demokraci e mirëfilltë, por demokraci hibride se kanë veshur me pushtet individin që fiton zgjedhjet me pushtet të pakufishëm që jo vetëm nuk duhet ta ketë, por nuk i takon.”
