TIRANË– Detaje të reja janë zbardhur në lidhje me dosjen që Prokuroria e Posaçme Kundër Korrupsionit dhe Krimit të Organizuar (SPAK) ka dorëzuar një ditë më para në Gjykatën e Posaçme ku kërkohet lëshimi i fletë-arrestit për ish-zëvendëskryeministrin Arben Ahmetaj. Kjo lëvizje e SPAK erdhi pak orë pasi Kuvendi i dha “dritën jeshile” arrestimin e tij duke i hequr imunitetit parlamentar.
Dosja e Arben e Ahmetaj është në dorën e gjyqtarit të posaçëm Erion Bani. Ndërkohë bëhet me dije se në dosjen voluminoze të SPAK janë dhe emra të tjerë përveç atij të Ahmetajt. Prokuroria e Posaçme e akuzon ish-numri dy të qeverisë për korrupsion pasiv në 6 raste, shpërdorim detyre dhe pastrim të produkteve të veprës penale, Mbetet ende e paqartë se pë deputet apo zyrtarë bëhet fjalë, pyetja që shtrohet është: Kush e ka radhën?!
Arben Ahmetaj është deri më tani zyrtari më i lartë i shtetit që do të shkojë para drejtësisë, gjithmonë nëse kapet nga Policia duke qenë se tashmë prej ditësh ai është i arratisur. Vendndodhja e tij referuar avokatëve është Mbretëria e Bashkuar por deri më tani asgjë e provuar.
Fillimisht Arben Ahmetaj do të shpallet në kërkim kombëtar nga Prokuroria e Posaçme. Nëse ai nuk e gjendet brenda kufirit, atëherë shpallet në kërkim ndërkombëtar dhe njoftohen të gjithë agjencitë ligjzbatuese partnere për lokalizimin dhe arrestimin e tij. Pavarësisht heqjes së imunitetit, ai vijon të jetë deputet i Kuvendit të Shqipërisë, ndërsa mandatin e humb nëse nuk paraqitet për 6 muaj në Kuvend. Dosja e Arben Ahmetaj ka trazuar ujërat politikë dhe e ka bërë më të ashpër debatin parlamentar.
