TIRANË– Kryeministrja e Serbisë Ana Brnabiç ka komentuar vizitën e saj në Tiranë këtë të hënë në kuadër të procesit të Berlinit. Takimi informal me liderët e rajonit është thirrur nga kryeministri Edi Rama dhe do të mbahet në vilën qeveritare “30”. Kryeministrja serbe tha se me Ramën do të diskutojë për nismën e Open Balkan. Pavarësisht deklaratave, Brnabiç beson se Rama nuk është kundër nismës së Open Balkan. Sipas saj e ardhmja e kësaj nisme do të jetë më e ndritur.
Ana Brnabiç: Pavarësisht disa deklaratave, nuk besoj se Rama është kundër nismës Ballkani i Hapur, mendoj se për këtë ka folur në konferencën e fundit për shtyp me presidentin e Serbisë, Aleksandar Vuçiç. Besoj se e ardhmja e saj është e ndritshme dhe e sigurt dhe që edhe vendet e tjera të rajonit t’i bashkohen kësaj nisme. Ky është vetëm fillimi dhe nëse shihni shkëmbimin e ndërsjellë të mallrave mes Shqipërisë, Serbisë dhe Maqedonisë së Veriut, harmonizimin e procedurave doganore dhe fitosanitare, shkurtimin e kohës së pritjes në pikat kufitare, qytetarët dhe ekonominë do të na detyrojnë jo vetëm neve, por edhe gjenerata e ardhshme e politikanëve të vazhdojë me këtë iniciativë dhe ta zgjerojë atë.
