TIRANË– Kryetari i Partisë Demokratike po zhvillon një konferencë të jashtëzakonshme për mediat ku po paraqet një raport që sipas tij provon se shpallja e tij “non grata” nga Britania e Madhe është bërë me porosi të miliarderit Xhorxh Sorors, kryeministrit Edi Rama, ish-ambasadores së SHBA-së Yuri Kim dhe kryeminsitrit Edi Rama. Sipas Berishës ishte edhe lidhja e tij me Damir Fazlliç, që sipas Home Office, ai e ka mbrojtur kur kanë dalë fakte për inkriminimin e tij. Por kreu i PD-së shprehet se s’ka asnjë provë kundër Fazlliç në Shqipëri se ka shkelur ligjin.
Sali Berisha: Rasti i dytë, Damir Fazlliç. Sipas Home Office, e kam mbrojtur kur kanë dalë fakte për inkriminimin e tij. Burimet janë BIRN, Balkan Insight, Reporter.al të superspekulantit Soros. Fazlliç nuk ka qenë kurrë i inkriminuar në Shqipëri, SHBA apo ndonjë vend tjetër. Ndaj tij në Shqipëri nuk kanë dalë kurrë prova të veprimtarisë inkriminuese gjatë kohës që kam qenë kryeministër apo më vonë. Pas një hetimi të nisur nga Ina Rama, u gjet se Fazlliç nuk kishte shkelur asnjë ligj. Në një moment, kur po shkonte në aeroport, prokuroria kërkon arrestimin e tij pa lëshuar një urdhër-arrest. Asnjë shtetas nuk mund të arrestohet pa urdhër. Kur prokuroria i kërkoi paraqitjen, ai erdhi dhe prokuroria konkludoi se ai nuk kishte shkelur asnjë ligj.
